O xoves 5 de novembro estivemos en Vilasantar ofrecendo unha charla informativa sobre a Comunidade Enerxética do municipio, Vilasantar Enerxía,  tratando o seu estado actual e as oportunidades que ofrece o novo marco normativo.

Constituída en 2024, a Comunidade levaba uns meses sen celebrar reunións, e entre elas instalábase un sentimento común de desmotivación tras varios intentos frustrados de atopar financiamento público para a iniciativa. Non é unha situación illada: moitas Comunidades Enerxéticas atravesan etapas nas que non ven avances, e esa barreira pode facer minguar o interese, e mesmo a levar á desaparición da iniciativa. Por iso é imprescindible volver conectar ás persoas socias cos seus obxectivos comúns e marcarse un cronograma claro de pequenas actuacións.

A xornada reuniu a 12 persoas e estivo marcada polo debate, que desembocou nunha serie de acordos:

• Reactivar a participación interna. Proponse volver reunir á xunta directiva e convocar unha asemblea coas persoas socias para avaliar o estado actual e saber quen queren continuar e quen non (a participación é libre, aberta e voluntaria), sobre todo tendo en conta as oportunidades entorno á ampliación a 5km do radio no que un autoconsumo comparte enerxía.

• Repartir responsabilidades. Durante toda a sesión lembrouse que o peso da Comunidade non debe recaer unicamente no Concello. O presidente e principal impulsor da Comunidade é o propio alcalde, Fernando Pérez Fernández e, ante o peso das súas propias responsabilidades, é recomendable dividir máis as tarefas e que máis persoas asuman un papel activo.

• Gañar en transparencia. Durante os últimos meses a Comunidade si estivo traballando, por exemplo solicitando varias axudas, pero non todas as persoas socias estaban ao tanto. Comprométense a compartir a información de forma máis clara e continua.

• Seguir ampliando o círculo a pequena escala. Suxírese continuar co efecto chamada a través de conversacións informais e de eventos festivos xa programados no municipio, que a propia Comunidade pode aproveitar para darse a coñecer.

• Aprender doutras experiencias. Da man do GDR, proponse visitar outras comunidades enerxéticas xa en marcha que poidan servir de aprendizaxe para seguir adiante de xeito máis seguro.

• Sumar ás empresas locais. Coas empresas do municipio que xa contan cunha instalación, exponse a vía de sentarse a falar sobre a posibilidade de ceder ou comprar unha parte dos seus excedentes, ou mesmo de aproveitar a instalación existente engadindo máis paneis e/ou unha batería achegada pola propia Comunidade. Ademais de rendibilizar recursos que xa existen, esta alianza resulta especialmente beneficiosa porque as empresas consomen en horarios distintos aos dos fogares, o que permite aproveitar mellor a instalación.

Esta xornada é un exemplo do traballo que Redenerxía desenvolve nos territorios dos GDR Seitura 22, Terra Chá, Terras de Miranda e Ulla-Tambre-Mandeo: acompañar ás Comunidades Enerxéticas en cada fase do seu camiño, tamén cando o proxecto se frea, ofrecendo apoio técnico, xurídico e social para desbloquealo e devolverlle o impulso colectivo. Porque ningunha Comunidade Enerxética ten por que percorrer o camiño soa, e compartir experiencias entre iniciativas é unha das mellores formas de seguir avanzando.